Gísli Hauksson, forstjóri GAMMA, segist vilja skrá Almenna leigufélagið, sem sjóðir GAMMA eiga, á hlutabréfamarkað á næsta ári. Hann segir félagið stefna að því að reisa 4 þúsund íbúðir á næstu fimm árum.
Þetta kemur fram í viðtali fréttastofu Bloomberg við Gísla. Í viðtalinu segir Gísli að útlit sé fyrir áframhaldandi húsnæðisskort þó að dregið gæti úr honum á næstu tveimur árum.
„Flest bendir til þess að eftirspurn aukist áfram sem mun ala á frekari hækkunum, að öðru óbreyttu.“ Jafnframt segir Gísli að lækkun vaxta leiði til meiri verðhækkana.
Fyrir tæpu einu og hálfu ári festi Almenna leigufélagið kaup á Leigufélaginu Kletti sem var dótturfyrirtæki Íbúðalánasjóðs. Með kaupunum bættust 450 íbúðir við þær 550 sem Almenna leigufélagið átti á þeim tíma en nú á félagið rúmlega 1.200 íbúðir.