Hinn 6 ára Ryan sem stýrir þáttunum Ryan ToysReview á Youtube hafði meira en milljarð í tekjur af auglýsingum á þessu ári samkvæmt lista Forbes yfir tekjuhæstu Youtube-stjörnurnar.
Þetta kemur fram í frétt Business Insider.
Samkvæmt mati Forbes námu tekjur af Youtube-rásinni 11 milljónum Bandaríkjadala fyrir skatt, eða tæpum 1,2 milljörðum íslenskra króna. Það gerir Ryan litla að áttundu tekjuhæstu Youtube-stjörnunni. Um tíu milljónir manns eru áskrifendur að rásinni.
Í þáttunum fjallar Ryan um ný leikföng. Foreldrar Ryans stofnuðu rásina fyrir rúmum tveimur árum þegar Ryan spurði hvers vegna hann gæti ekki sjálfur fjallað um leikföng á Youtube eftir að hafa horft á aðra krakka gera það.
Að neðan má sjá Ryan fjalla um nammisjálfsala úr pappa.