Framtakssjóðurinn Horn III hefur keypt hlut í Bílaleigu Flugleiða ehf. sem rekur bílaleigu undir vörumerkinu Hertz á Íslandi. Þetta kemur fram á vef Samkeppniseftirlitsins en þar segir að rannsókn eftirlitsins hafi leitt í ljós að engin samþjöppun eigi sér stað í kjölfar samrunans.
Þó hafa verið sett hafa skilyrði í málinu til þess að tryggja samkeppnislegt sjálfstæði Bílaleigu Flugleiða gagnvart Landsbankanum og er það niðurstaða eftirlitsins að umrædd skilyrði leysi þá samkeppnisbresti sem ella hefðu stafað af samrunanum.
Landsbankinn átti áður allt hlutaféð í Bílaleigu Flugleiða en seldi fyrirtækið árið 2010 til félags í jafnri eigu Sigfúsar R. Sigfússonar, Sigfúsar B. Sigfússonar, Hendriks Berndsen og Sigurðar Berndsen. Þrír síðasttöldu kaupendanna áttu og ráku ALP bílaleigu á árunum 2000 til 2004. Sigfús R. Sigfússon var um árabil eigandi og forstjóri bifreiðaumboðsins Heklu hf.
Áður en Landsbankinn tók félagið yfir var það í eigu Bergeyjar eignarhaldsfélags ehf., sem aftur var í eigu Smáeyjar ehf., en það félag var í eigu Magnúsar Kristinssonar, athafnamanns frá Vestmannaeyjum, og Lóu Skarphéðinsdóttur, eiginkonu hans. Þau keyptu Bílaleigu Flugleiða af FL Group árið 2006.
Horn III er um 12 milljarða króna framtakssjóður sem var stofnaður af Landsbréfum, dótturfélagi Landsbankans. Lokað var fyrir áskrift að hlutafé á fyrsta ársfjórðungi 2016. Hluthafar eru rúmlega 30 talsins og samanstanda af lífeyrissjóðum, fjármálafyrirtækjum og fagfjárfestum.