Biðst afsökunar á ummælunum um konur

Ak­b­ar Al Baker, stjórn­ar­for­maður IATA og for­stjóri Quat­ar-flug­fé­lags­ins, hefur beðist afsökunar á ummælum sínum um að konur gætu ekki sinnt starfi hans. 

Frétt af mbl.is

Þarf karlmann til að reka flugfélag

Þetta kemur fram í frétt breska ríkisútvarpsins BBC sem greindi í gær frá ummælum Al Baker sem hann lét falla á árs­fundi Alþjóðasam­bands flug­fé­laga (IATA). Hann sagði að karlmaður þyrfti að vera við stjórnvöl sambandsins af því að það væri krefjandi staða. 

Ummæli forstjórans ollu mikilli hneykslan, fyrst á fundinum sjálfum en síðan víðar eftir að greint var frá þeim í fjölmiðlum. Hann fann sig knúinn til þess að gefa út tilkynningu í dag vegna málsins.

„Ég vil biðjast innilegrar afsökunar ef ég móðgaði einhvern með ummælum mínum í gær sem fara þvert gegn því sem ég hef staðið fyrir með því að auka veg kvenna innan Qatar Airways Group og voru gerð að æsifréttum í fjölmiðlum,“ segir í tilkynningu frá Al Baker. 

Hann segir jafnframt að flugfélagið leggi áherslu á jafnrétti kynjanna og að það hafi verið brautryðjandi í þeim efnum í Mið-Austurlöndum. Þá sagðist hann ekki trúa því að einungis karlmaður gæti sinnt starfi hans. 

• Blogga um frétt