Fjármálaeftirlit Bandaríkjanna hefur komist að samkomulagi við Elon Musk, stjórnanda og stofnanda Tesla um að fella niður kæru gegn honum. Í vikunni var greint frá því að eftirlitið hefði kært Musk vegna ummæla hans á Twitter um að hann hefði ákveðið að taka Tesla af markaði, en síðar hætti hann við þau áform.
Samkvæmt samkomulaginu mun Musk stíga til hliðar sem stjórnarformaður fyrirtækisins og greiða 20 milljón dala sekt. Hann mun þó áfram fá að starfa sem forstjóri félagsins. Til viðbótar mun Tesla einnig fá 20 milljón dala sekt vegna málsins.
Samkvæmt fjármálaeftirlitinu voru ummæli Musk fölsk og misvísandi. Ummælin umdeildu birtust í færslu sem Musk birti á Twitter 7. ágúst. Það kom mörgum mjög á óvart þegar Musk birti færsluna þar sem hann hefði „tryggt fjármögnun“ afskráningar fyrir 420 dali á hlut. Það leiddi til þess að hlutabréfaverð hækkaði, en engin innistæða virtist vera fyrir ummælum Musk og sagðist hann síðar hafa hætt við áformin.