Seðlabanki Evrópusambandsins tilkynnti í dag að hann hefði tekið ákvörðun um að setja tímabundið nýja stjórn yfir ítalska bankann Banca Carige í kjölfar þess að meirihluti stjórnarmanna hans sagði skilið við stjórn hans.
Fram kemur í yfirlýsingu frá fjármálaeftirliti seðlabankans að nauðsynlegt hafi verið að taka yfir stjórn Banca Carige til þess að koma á stöðugleika í stjórnun hans. Ákvörðunin kom í kjölfar þess að viðskipti með hlutabréf í bankanum voru stöðvuð fyrr í dag.
Verð á hlutabréfum í Banca Carige lækkaði mikið í síðustu viku eftir að stjórn bankans mistókst að koma sér saman um hlutafjáraukningu og sat stærsti hluthafinn, Malacalza-sjóðurinn, hjá við atkvæðagreiðsluna um hana.
Hlutafjáraukning upp á 400 milljónir evra var einn hluti af áætlun um endurskipulagningu Banca Carige sem seðlabankinn hafði samþykkt. Hlutafjáraukningin hefði verið sú fjórða á undanförnum fimm árum. Virði hlutabréfa í bankanum hefur minnkað um 90% á undanförnum þremur árum.
Alþjóðlega matsfyrirtækið Fitch lækkaði lánshæfismat Banca Carige í CCC+ í október með neikvæðum horfum og varaði við því að gjaldþrot væri „raunverulegur möguleiki“.