Haukur Hafsteinsson, framkvæmdastjóri LSR – Lífeyrissjóðs starfsmanna ríkisins, ætlar að láta af störfum snemma í sumar. Þetta tilkynnti hann starfsfólki á fundi í morgun, en greint er frá starfslokum hans á vefsíðu sjóðsins.
Haukur hefur starfað að lífeyrismálum ríkisstarfsmanna allan starfsferil sinn eða frá því hann útskrifaðist úr lögfræði í Háskóla Íslands 1982. Hann réð sig fyrst til starfa hjá Tryggingastofnun ríkisins sem annaðist þá rekstur nokkurra lífeyrissjóða, þar á meðal sjóðs ríkisstarfsmanna. Frá árinu 1985 hefur Haukur verið forsvarsmaður LSR og hefur gegnt því starfi í 34 ár samfleytt þegar hann hverfur af þeim vettvangi í sumar.
„Ég verð 65 ára á hausti komanda og tel einfaldlega að nú sé réttur tími til breytinga. Í sjálfu sér hefði ég vel getað starfað hér lengur en gerði það upp við mig á síðastliðnu ári að ég myndi hætta sumarið 2019,“ er haft eftir Hauki á vef sjóðsins.
Stjórn LSR mun síðar í marsmánuði auglýsa starf framkvæmdastjóra laust til umsóknar.