Orkuveita Reykjavíkur hagnaðist um 1,16 milljarða á þriðja ársfjórðungi þessa árs, samanborið við 1,7 milljarða hagnað á sama tíma í fyrra. Þá var hagnaður fyrstu níu mánaða ársins 4,5 milljarðar, en var 5,9 milljarðar á sama tíma í fyrra. Þetta kemur fram í níu mánaða uppgjöri fyrirtækisins.
Rekstrartekjur á þriðja ársfjórðungi námu 10,08 milljörðum, en voru á sama tíma í fyrra 10,29 milljarðar. Rekstrarkostnaður lækkaði einnig, en hann var 3,8 milljarðar á þriðja ársfjórðungi þessa árs og lækkaði úr 3,91 milljörðum á sama tíma í fyrra. Rekstrarhagnaður fyrir afskriftir, fjármagnsgjöld og skatta nam 6,27 milljörðum og lækkar um rúmlega 100 milljónir milli ára. Þegar tekið hefur verið mið af afskriftum er rekstrarhagnaðurinn 3,1 milljarður á þriðja ársfjórðungi í ár, eða tæplega einum milljarði lægri en á sama tíma í fyrra.
Fjárfestingar félagsins í varanlegum rekstrarfjármunum nema 13,1 milljarði á fyrstu níu mánuðum ársins, en námu 10,4 milljörðum á sama tíma í fyrra. Er það aukning um 26% milli ára.
Í tilkynningu frá Orkuveitunni vegna uppgjörsins er haft eftir Ingvari Stefánssyni, framkvæmdastjóra fjármála, að fjárhagsstaða félagsins og dótturfélaga sé traust. „Framundan eru mikilvæg verkefni í starfseminni. Ein stærsta einstaka fjárfesting okkar á næstu árum er uppfærsla á orkumælum viðskiptavina. Hún mun taka nokkur ár en gera okkur kleift að auka og bæta þjónustuna,“ er haft eftir honum.