Verð bréfa Icelandair hefur hækkað um 6,6% í tæplega 200 milljóna króna viðskiptum í Kauphöllinni í morgun, en í gær var greint frá því að félagið hefði flutt 25% fleiri farþega árið 2019 en árið á undan. Þá geri félagið ráð fyrir að farþegum á fyrsta fjórðungi þessa árs fjölgi einnig um 25-30%.
Í heild flutti félagið 1,9 milljónir farþega til landsins í fyrra, þar af 106 þúsund í desember þar sem þeim fjölgaði um 11%. Tengifarþegum fækkaði hins vegar um 9% í desember en fækkun þeirra var 9% á árinu í heild. Sætanýting í millilandastarfsemi félagsins var 80,7% í desember samanborið við 79,6% á sama tíma árið 2018.
Flest önnur félög í Kauphöllinni hafa einnig hækkað í viðskiptum í dag, en næstmest hækkun er hjá Högum sem hafa hækkað um 2,54% í um 215 milljóna viðskiptum. VÍS hefur hækkað um 1,45% í 132 milljóna viðskiptum, Sjóvá um 1,3% og Skeljungur einnig um 1,3%. Þá hefur Marel hækkað um 1,2% í 540 milljóna viðskiptum.