Baldur Arnarson
Anna Hrefna Ingimundardóttir, forstöðumaður efnahagssviðs Samtaka atvinnulífsins, segir fleira þurfa að koma til en vaxtalækkanir til fyrirtækja, ef forðast eigi fjöldagjaldþrot vegna kórónuveirukreppunnar.
„Þar sem vandinn í efnahagskerfinu stafar fyrst og fremst af mikilli röskun á framleiðsluhliðinni er vissulega mikilvægt að stuðningur yfirvalda skili sér til fyrirtækja sem eiga erfitt með að standa undir þungri vaxtabyrði á meðan veruleg tekjuskerðing er að eiga sér stað. Maður veltir því fyrir sér hvort stuðningurinn þurfi e.t.v. að koma í öðru formi en vaxtalækkunum í ljósi aðstæðna.“
Bankakerfið í lykilhlutverki
„Mörg fyrirtæki hafa verið að kalla eftir auknum sveigjanleika í bankakerfinu til að endursemja um skilmála, vexti og afborganir og að þeim verði gert auðveldara fyrir að frysta lán til lengri tíma en nokkurra mánaða, í ljósi þeirrar miklu óvissu sem hefur skapast. Þetta er auðvitað eitthvað sem bankakerfið þarf að leika lykilhlutverk í að meta, en mætti skoða hvort gagnaðist mörgum fyrirtækjunum í raun betur en vaxtalækkun ef ætlunin er að forðast fjöldagjaldþrot með tilheyrandi afleiðingum,“ segir Anna Hrefna.
Nánar er rætt við hana og Ingólf Bender, aðalhagfræðing Samtaka iðnaðarins, í Morgunblaðinu í dag.