Prentsmiðjan Ásprent Stíll á Akureyri hefur verið tekin til gjaldþrotaskipta. Þetta kemur fram í Vikublaðinu. Þar segir einnig að starfsfólk hafi ekki fengið greidd út laun um mánaðamótin.
Rekstur félagsins hefur að sögn Vikublaðsins verið þungur undanfarið en Covid-19 hafi haft þau áhrif að ekki yrði séð fram úr honum.
Fjárhagsleg endurskipulagning með lánardrottnum félagsins tókst ekki og hefur skiptastjóri verið skipaður yfir eignum þess. Starfsemi mun halda áfram í sömu mynd þangað til annað verður ákveðið.
Gjaldþrot Ásprents mun ekki hafa áhrif á útgáfu Vikublaðsins, Dagskrárinnar og Skrárinnar sem eru héraðsmiðlar á Akureyri og nágrenni, gefin út af Útgáfufélaginu.