Viðskipti | mbl | 12.4.2021 | 13:14

Röskun á þjónustu Arion um komandi helgi

Röskun verður á þjónustu Arion banka um helgina vegna innleiðingar á nýju kerfi. mbl.is/Eggert Jóhannesson

Röskun verður á þjónustu Arion banka um komandi helgi, en nýtt greiðslu- og innlánakerfi verður þá innleitt í samstarfi við Reiknistofu bankanna.

Í tilkynningu frá bankanum kemur fram að búast megi við skertri virkni í Arion appinu, netbankanum og hraðbönkum alla helgina. Um hádegisbil á sunnudaginn, í samtals 2-4 klukkustundir má svo gera ráð fyrir að þessar þjónustuleiðir verði alveg lokaðar og gæti það jafnframt haft áhrif á virkni debet- og kreditkorta.

Segir bankinn að hefðbundin þjónusta verði komin á aftur á mánudaginn.

Áhrif á þjónustu bankans um helgina eru eftirfarandi:

Debet- og kreditkort

Hægt verður að nota greiðslukort um helgina nema hvað skammvinn truflun getur orðið á notkun debetkorta sunnudaginn 18. apríl.
Ekki verður hægt að greiða inn á kreditkort.
Innborgun á debetkort kemur ekki til hækkunar á ráðstöfunarupphæð fyrr en á sunnudagskvöld.

Arion appið, netbanki og hraðbankar

Verða óvirk í 2-4 klst. sunnudaginn 18. apríl
Staða reikninga og korta mun ekki uppfærast með réttum hætti fyrr en á sunnudagskvöld.
Ekki verður hægt að stofna reikninga.
Ekki verður hægt að stofna yfirdráttarheimild, breyta henni eða fella hana niður.

Millifærslur og greiðslur

Hægt verður að millifæra milli reikninga í netbanka og Arion appinu og úr netbönkum annarra banka og sparisjóða.
Upplýsingar um millifærslur og greiðslur til og frá Arion banka, sem framkvæmdar eru frá miðnætti aðfaranótt laugardags til sunnudagskvölds, verða ekki sýnilegar að fullu í kerfum Arion banka en verða sýnilegar í öðrum bönkum.
Upphæðir, sem millifærðar eru á reikninga í Arion banka yfir helgina, verður ekki hægt að millifæra áfram yfir á aðra reikninga fyrr en á sunnudagskvöld. Hins vegar er hægt að nýta þær með því að greiða með debetkortum og taka þær út í hraðbanka.
Upplýsingar um ógreidda reikninga uppfærast ekki, þ.e. ef reikningur er greiddur birtast þær upplýsingar ekki fyrr en á mánudag.

Nýja kerfið er frá hugbúnaðarfyrirtækinu Sopra og leysir eldra kerfi af hólmi.