Framkvæmdasýslan og Ríkiseignir í eina sæng

Ríkiseignir og Framkvæmdasýsla ríkisins sameinast frá og með 15. september næstkomandi undir heitinu Framkvæmdasýslan - Ríkiseignir. Ákvörðunin um sameininguna byggist á niðurstöðum vinnu fjármála- og efnahagsráðuneytis og beggja stofnana, sem staðið hefur frá síðastliðnu hausti.

Þetta kemur fram í tilkynningu frá fjármála- og efnahagsráðuneytinu.

„Með sameiningunni fæst mikil samlegð þar sem húsnæðis- og aðstöðumál ríkisins verða á einni hendi, hvort sem um er að ræða framkvæmda- eða leiguverkefni. Fasteignasafn stofnunarinnar er hið stærsta á landinu en það telur um 530 þúsund fermetra húsnæðis í um 380 fasteignum víðsvegar um landið. Mun sameiningin skila bættri áætlanagerð og stýringu eignasafnsins, sem ætlað er að leiða til aukinnar skilvirkni, betri þjónustu og þar með fjárhagslegs ávinnings,“ segir í tilkynningunni.

300 jarðir í ríkiseigu heyra undir stofnunina

Þar kemur fram að fasteignirnar sem falli undir sameinaða stofnun hýsi m.a. framhaldsskóla, heilbrigðisstofnanir, söfn, lögreglustöðvar og hefðbundið skrifstofuhúsnæði.

„Jafnframt munu um 300 jarðir í ríkiseigu heyra undir stofnunina. Þá mun stofnunin gegna hlutverki miðlægs leigutaka húsnæðis fyrir hönd ríkisins. Á næstunni verður unnið að samþættingu stofnananna hvað varðar mótun nýs skipulags og stefnumótunar, í nánu samstarfi við ráðuneytið,“ segir í tilkynningunni og jafnframt:

„Þær eignir ríkisins sem ekki heyra undir stofnunina eru fasteignir Háskóla Íslands og Landspítala. Fyrr á árinu var stofnað félag um rekstur fasteigna HÍ, sem stýrir um 100 þúsund fermetrum og fyrir liggja áform um miðlægan rekstur fasteignasafns Landspítalans sem telur um 160 þúsund fermetra.“

• Blogga um frétt