Íslandsbanki hagnast um 5,9 milljarða

Hagnaður Íslandsbanka nam 5,9 milljörðum króna á öðrum ársfjórðungi miðað 5,4 milljarða króna á sama tímabili í fyrra. Rekstrartekjur bankans námu 14 milljörðum króna, miðað við 12,1 milljarð á öðrum ársfjórðungi í fyrra.

Arðsemi eiginfjár var 11,7% á ársgrundvelli, sem er yfir spám greiningaraðila. 

Hreinar vaxtatekjur jukust um 21,8% á milli ára og námu 10,3 milljörðum króna. Hreinar þóknanatekjur námu 3,4 milljörðum og jukust um 18,1% á milli ára. Hreinar fjármunatekjur námu 208 milljónum og drógust saman um 411 milljónir miðað við sama tímabil í fyrra.

Uppfærir leiðbeinandi tölur 

Útlán til viðskiptavina jukust um 45,8 milljarða króna á fjórðungnum, eða 4,1%. Alls námu útlán til viðskiptavina 1.154 milljörðum króna í lok júní. 

Eigið fé bankans nam 203 milljörðum króna í lok júní. 

Bankinn uppfærir leiðbeinandi tölur fyrir árið í ljósi góðrar afkomu. Arðsemi verði yfir 10%, en áður var reiknað með 8-10%. Kostnaðarhlutfall er lækkað í 44-47% úr 45-50%. 

„Við Íslandsbankafólk getum svo sannarlega verið ánægð með uppgjör annars ársfjórðungs þar sem hagnaður nam 5,9 milljörðum króna og var arðsemi 11,7% sem er yfir okkar fjárhagsmarkmiðum,“ er haft eftir Birnu Einarsdóttur bankastjóra í tilkynningu. 

„Við sáum sterkan vöxt í tekjum bæði hvað varðar vaxta- og þóknanatekjur eða 21% á milli ára. Á sama tíma náðist raunlækkun kostnaðar um 5,9%. Kostnaðarhlutfall var 42,7% á tímabilinu sem er jafnframt umfram fjárhagsmarkmið bankans.“

Fréttin hefur verið uppfærð.

• Blogga um frétt