Fjölsótt Charge-orkuráðstefna brandr í Berlín

Um 200 manns sóttu tveggja daga ráðstefnu íslenska ráðgjafarfyrirtækisins brandr í Berlín í upphafi vikunnar. Ráðstefnan bar yfirskriftina „Charge Energy Branding“, sem er samhljóða sjálfstæðu vörumerki hjá fyrirtækinu, þar sem fjallað var um vörumerkjaþróun og vaxtarskilyrði í orkugeiranum.

Meðal fyrirlesara voru alþjóðlegir sérfræðingar á þessu sviði, meðal annars frá Volkswagen, EON og SAP, auk þess sem íslensk fyrirtæki á borð við Green by Iceland og HS Orka áttu fulltrúa. Þá voru veitt svonefnd Charge-verðlaun, meðal annars fyrir grænustu vörumerki veraldar, á sérstakri athöfn sem haldin var í sendiráði Norðurlanda í Berlín.

„Við höfum frá stofnun fyrirtækisins árið 2016 sinnt erlendum viðskiptavinum í miklum mæli og haft til þess sérhæft starfsfólk bæði heima á Íslandi og erlendis. Opnun á nýjum útibúum brandr í Finnlandi, Noregi og Þýskalandi á síðustu misserum gerir okkur kleift að öðlast enn frekari styrk og breidd í starfseminni, innan sem utan landsteinanna,“ segir dr. Friðrik Larsen, stofnandi brandr.

Hann segir við hæfi að ráðstefnan í Berlín hafi verið haldin í Axica-ráðstefnumiðstöðinni við Brandenborgarhliðið, þar sem miðstöðin sé hönnuð af Frank Gehry, arkitekt Guggenheim-safnsins í Bilbao.

„Til er þekkt hugtak sem kallað er „Bilbabo-áhrifin“ og lýtur að þeim róttæku breytingum, sem afgerandi byggingar og djörf vörumerki á borð við Guggenheim-safnið geta haft á framþróun og uppgang samfélaga,“ segir Friðrik.

„Við viljum staðsetja okkur á mörkum vísinda og vörumerkjaþróunar og það var ákaflega gefandi að upplifa þessar móttökur í Berlín. Ég reikna með að ráðstefnan þar verði eftirleiðis árviss viðburður, en við höfum haldið sambærilegar ráðstefnur árlega í bæði Houston og Reykjavík.“

Hér fyrir neðan má sjá myndir af ráðstefnunni í Berlín.