„Reiknaði aldrei með svona svakalegri vertíð“

„Þetta er í raun lygilegur árangur hjá tveimur körlum á litlum báti,“ segir Unnsteinn Þráinsson, skipstjóri á Sigga Bessa SF 97 frá Hornafirði, 15 tonna og 12 metra báti.

Þeir hættu makrílveiðum við Keflavík um helgina og höfðu þá landað um 520 tonnum og má áætla að aflaverðmætið sé um 30 milljónir króna brúttó. Alls hafa um 50 minni bátar landað makríl á vertíðinni, fjórir eru komnir með yfir 400 tonn og um 30 með meira en 100 tonn.

Í umfjöllun um veiðar þessar í Morgunblaðinu í dag segir Unnsteinn að þetta sé langmesti afli sem hann hafi fengið á makrílvertíð, trúlega meira en tvöfalt það sem hann hafi áður fengið á einni vertíð. Hann segir að ástæðulaust sé að kvarta yfir afkomunni en ýmsir taki þó sinn toll af innkomunni.