Aukið verði við kolmunnakvótann

Alþjóðahafrannsóknarráðið (ICES) leggur til að kolmunnaafli ársins verði allt að 1.342 þúsund tonn, sem er mikil aukning frá árinu 2016 þegar ráðlagt var að 776 þúsund tonn yrðu veidd. 

Þetta er aðallega vegna hærra mats á árgöngum 2013 og 2014 í stofnmati ársins 2016 heldur en árið 2015. Stofnmat er einnig mjög viðkvæmt fyrir mati á aldursgreindum vísitölum nýjasta leiðangurs, en þær voru mun hærri árið 2016 en árið 2015.

Hrygningarstofninn er nú metinn um 5 milljónir tonna og samkvæmt matinu mun stofninn áfram vaxa nema veiðar verði verulega umfram ráðgjöf.

Aflareglan, sem var samþykkt árið 2008, er fallin úr gildi. Ekki hefur enn náðst samkomulag milli þeirra þjóða sem stunda veiðar úr stofninum um skiptingu, en áætlað er að heildaraflinn í ár verði tæp 1,150 milljón tonn, þar af afli íslenskra skipa um 164 þúsund tonn.

• Blogga um frétt