VM, fé­lag vél­stjóra og málm­tækni­manna, mun í dag og á morgun undirbúa kynningu á nýundirrituðum samningi sjómanna og útgerðarmanna fyrir félagsmenn sína. Guðmund­ur Ragn­ars­son, formaður VM, segir í samtali við mbl.is að samningurinn verði væntanlega birtur á vefsíðu félagsins fljótlega.

Sjómannasamböndin hafa tilkynnt að atkvæðagreiðsla um samningana muni hefjast strax í dag og að niðurstaða muni liggja fyrir klukkan 20 á morgun. Guðmundur segir að þetta sé aðeins öðruvísi fyrir landssamtök eins og VM og að félagið muni setja upp rafræna kosningu um helgina sem muni ljúka næsta laugardag.

Fram að því hefur verkbanni auðvitað verið frestað og munu vélstjórar halda til sjós um eða strax eftir helgi.

Guðmundur segir að það sé auðvitað eðli vinnunnar að vera aldrei ánægður með kjarasamninga. Sumt hafi þurft að gefa eftir á meðan annað hafi áunnist. „En ég held að eftir allt sem hefur gengi á, 10 vikna verkfall, þá verðum við að ganga sáttir frá borði. Það verður ekki sagt að ekki hafi verið reynt,“ segir Guðmundur.

Hann segir að nú verði sjómenn og vélstjórar að leggja raunsætt mat á samningana, enda ljóst að ekki hafi verið hægt að komast lengra. Spurður hvort einhver sérstök atriði hafi staðið út af segir hann að svo sé alltaf og það séu alls konar hugtök sem menn hafi velt upp í umræðunni eins og nýsmíðaálag og annað sem ekki hafi náðst full sátt um.

Á heildina litið er hann þó bjartsýnn. „Ég fer svellkaldur að tala fyrir þessum samningi,“ segir hann og bætir við að nú verði farið í að undirbúa kynningu og kosningasíðu. Þrátt fyrir að verkfallið hafi haft mikil áhrif á vertíðina segist Guðmundur bjartsýnn á að hægt verði að ná öllum loðnukvótanum í ár.

Tengdar fréttir

Kjaramál sjómanna

„Þetta er hrein og klár misnotkun“

• Sjómönnum tryggt 54% meira fyrir þorskinn
• „Er þetta réttlát skipting?“
• „Nóg er komið af rugli og misskilningi“
• Níu ára stöðugleikaskeið í kjaramálum sjómanna

» Fleiri tengdar fréttir

• Blogga um frétt