Venus NS með 1.800 tonn af loðnu

Von var á Venusi NS til hafnar á Vopnafirði um hádegisbilið í dag með um 1.800 tonn af loðnu. Aflinn fékkst í tveimur köstum út af Skaftárósvita í gær.

Alls voru tekin fjögur köst í túrnum en í hinum tveimur rifnaði nótin, því er kemur fram á vef HB Granda.

Guðlaugur Jónsson, skipstjóri á Venusi, segir að bræla hafi verið alla leiðina, þótt skipið hafi verið vel á undan versta veðrinu.

Hann bætir við að ástandið á loðnunni sé mjög gott og magnið sé mikið.

„Í morgun skilst mér að gangan hafi verið komin vel vestur fyrir Dyrhólaey. Þetta er stór og góð loðna og uppistaðan í okkar afla er loðna sem telur um 35 til 40 stykki í kílóinu. Það þykir mjög gott,“ segir Guðlaugur Jónsson við HB Granda.

Hitt uppsjávarveiðiskip HB Granda, Víkingur AK, er nú á loðnumiðunum.

• Blogga um frétt