Loðnuvertíðin búin hjá HB Granda

Loðnuvertíð skipa HB Granda er lokið en Víkingur AK kom með síðasta farminn til Vopnafjarðar nú í byrjun vikunnar. Alls var tekið á móti 38.200 tonnum af loðnu í vinnslum HB Granda á Vopnafirði og Akranesi á vertíðinni. Sagt er frá þessu á vefsíðu HB Granda.

Haft er eftir Ingimundi Ingimundarsyni, útgerðarstjóra uppsjávarveiðiskipa HB Granda, að loðnuaflinn skiptist þannig að 20.200 tonnum var landað á Vopnafirði og 18.000 tonnum á Akranesi. Venus NS var með 14.300 tonna afla og Víkingur AK með 12.400 tonn. Önnur skip lönduðu samtals 11.500 tonnum.

14.000 tonn fóru til hrognatöku og frystingar á hrognum á Vopnafirði og 1.000 tonn af loðnu fóru til heilfrystingar. Annað fór til framleiðslu á loðnumjöli og -lýsi. Allur aflinn á Akranesi fór til hrognatöku og frystingar á hrognum. Afskurðurinn fór til vinnslu í fiskimjölsverksmiðjunni.

• Blogga um frétt