Halda stórslysaæfingu í september

Georg Kr. Lárusson, forstjóri Landhelgisgæslu Íslands, hefur undirritað yfirlýsingu ásamt yfirmönnum strandgæslustofnana sjö annarra norðurskautsríkja, um samvinnu og stefnu ríkjanna í leit, björgun, mengunarvörnum og öðru sem varðar öryggi þeirra sem fara um norðurslóðir.

Yfirmenn strandgæslustofnana norðurskautsríkjanna átta undirrituðu yfirlýsinguna á fundi sínum í Boston fyrir helgi.

Yfirmenn strandgæslustofnana ríkjanna. Ljósmynd/Landhelgisgæslan

Gæslan leiðir vettvanginn frá 2019

Á meðal þess sem ríkin féllust á er að halda stóra æfingu í september 2017 þar sem æfð verða viðbrögð við stórslysi á hafinu milli Íslands og Grænlands. Æfingin hefur hlotið nafnið Arctic Guardian.

Í tilkynningu segir að allar þjóðirnar muni taka þátt og fimm þeirra koma með mannskap og tækjabúnað, svo sem skip og loftför.

Strandgæslustofnanir ríkjanna, Íslands, Noregs, Svíþjóðar, Danmerkur, Finnlands, Rússlands, Kanada og Bandaríkjanna, mynda samráðsvettvanginn Arctic Coast Guard Forum. Þar hefur bandaríska strandgæslan farið með formennsku undanfarin tvö ár, eða frá því hópurinn var settur saman.

Á fundinum í Boston tók finnska strandgæslan við formennskunni til næstu tveggja ára.

Að þeim tíma loknum mun Landhelgisgæsla Íslands leiða vettvanginn, það er tímabilið 2019 til 2021.

• Blogga um frétt