Háar vísitölur þorsks, gullkarfa og löngu

Stofnvísitölur þorsks, gullkarfa og löngu mælast háar miðað við síðustu þrjá áratugi. Vísitala ýsu er nú nálægt meðaltali tímabilsins, en vísitölur steinbíts eru lágar. Þetta sýna nýjustu tölur úr stofnmælingum botnfiska á Íslandsmiðum í ár.

Á vef Hafrannsóknastofnunar segir að niðurstöðurnar séu mikilvægur þáttur árlegrar úttektar stofnunarinnar á ástandi nytjastofna við landið. Mat á stofnstærð helstu tegunda botnfiska og tillögur stofnunarinnar um aflamark fyrir næsta fiskveiðiár verði þá kynnt í júní.

Fram kemur að stofnmælingin hafi farið fram dagana 25. febrúar til 18. mars. Fjögur skip hafi tekið þátt í verkefninu að þessu sinni; rannsóknaskipin Árni Friðriksson og Bjarni Sæmundsson og togararnir Barði NK og Ljósafell SU. Togað var með botnvörpu á tæplega 600 stöðvum allt í kringum landið.

Sjá ítarlegri niðurstöður á vef Hafrannsóknastofnunar.

• Blogga um frétt