Lítill kraftur í kolmunnaveiðum

Lítill kraftur hefur verið í kolmunnaveiðum í færeysku landhelginni að undanförnu. Að sögn Hjalta Einarssonar, skipstjóra á Víkingi AK, er togað lengi og aðeins híft einu sinni á sólarhring.

Frá þessu er greint á vef HB Granda.

„Við köstuðum fyrst að kvöldi 11. maí þannig að þegar við hífum í kvöld verðum við búnir að vera fjóra sólarhringa að veiðum. Aflinn hefur verið þetta 250 til 300 tonn í holi en mest höfum við komist upp í 370 tonn,“ er haft eftir Hjalta á vefnum, en er rætt var við hann var Víkingur staddur austur af Færeyjum ásamt fleiri íslenskum skipum.

Þá segir, að nokkru sunnar hafi fleiri skip verið, þar á meðal Venus NS, en töluvert austar, beint suður af Færeyjum, voru flest færeysku skipanna að veiðum auk rússneskra skipa.

„Kolmunninn potast norður eftir en það er ekki hægt að segja að hann geri það í torfum eða stórum göngum. Þetta eru meira smá peðrur sem við erum að eltast við,“ sagði Hjalti enn fremur, en hann reiknaði með því að skipið héldi til hafnar um leið og ásættanlegum skammti væri náð.

• Blogga um frétt