TVG-Zimsen semur um sjófrakt til Ameríku

TVG-Zimsen hefur gert samstarfssamning við North Atlantic Cargo Line um sjófrakt til og frá Bandaríkjunum, Kanada og Suður-Ameríku. Boðið verður upp á vikulega heilgámaflutninga og safnsendingar frá Norfolk í Bandaríkjunum til Reykjavíkur. Þetta kemur fram í tilkynningu frá TVG-Zimsen.

Segir þar að NACL sé stýrt af Ólafi Matthíassyni, sem hafi áratuga reynslu af flutningum til og frá Bandaríkjunum. Þá sé NACL með vöruhús í Norfolk í Virginíu, sem sé mikilvæg höfn fyrir flestar borgir í Bandaríkjunum. Allar flutningaleiðir innan Bandaríkjanna séu mjög greiðar og skjótar til Norfolk.

„Skrifstofa NACL er í sama húsi og vöruhúsið, það gerir starfsmönnum fyrirtækisins kleift að hafa góða yfirsýn yfir allar sendingar sem fara þar í gegn. Einnig eru siglingar milli Norfolk og Evrópu hraðar og tíðari en til annarra hafna í Bandaríkjunum,“ er haft eftir Birni Einarssyni, framkvæmdastjóra TVG-Zimsen.

„Í gegnum öflugt flutninganet í Bandaríkjunum getur NACL séð um að sækja vöruna fyrir viðskiptavini okkar, hvar sem er í Bandaríkjunum, Kanada, S-Ameríku og komið henni áleiðis til Íslands á hraðan, öruggan og hagkvæman hátt,“ segir Björn.

• Blogga um frétt