Ákærður fyrir að stela og selja kvóta án leyfis

Embætti héraðssaksóknara hefur ákært karlmann á fimmtugsaldri fyrir fjárdrátt með því að hafa dregið sér í fjórum tilvikum 0,010246% af krókaaflahlutdeild í þorski og selt án heimildar fyrir tæplega 27 milljónir auk sölulauna og færslugjalds. Maðurinn er löggiltur skipasali og eigandi skipasölu.

Í ákærunni segir að maðurinn hafi komist yfir verðmætin þegar hann hafði umsýslu með krókaaflahlutdeild í eigu útgerðar og að hann hafi nýtt fjármunina sem komu til vegna sölunnar í eigin þágu og í þágu eigin skipasölu.

Meint brot áttu sér stað á árunum 2013 til 2014, en maðurinn seldi krókaaflahlutdeild til fjögurra útgerða og skrifaði undir umsókn til Fiskistofu. Segir í ákæru að maðurinn hafi skrifað undir með nafni eiganda þeirrar útgerðar sem hann hafði umsýslu með án heimildar eigandans.

Þá er maðurinn einnig ákærður fyrir að hafa misnotað aðstöðu sína sem skipasali með því að hafa í þremur tilfellum leigt samtals 7.000 kíló af krókaaflamarki og dregið sér endurgjald leigunnar, samtals 1,2 milljónir, þegar hann leigði kvóta fyrrnefndrar útgerðar.

• Blogga um frétt