Sindri VE-60 til Eyja í fyrramálið

Sindri VE-60, gamli Páll Pálsson, kemur til hafnar í Vestmannaeyjum í fyrramálið eftir að hafa verið í slipp í Reykjavík að undanförnu. Vinnslustöðin keypti skipið af Hraðfrystihúsinu Gunnvöru nýverið til að brúa bilið frá því að Gullberg hverfur á braut til nýrra eigenda og þar til Breki, glænýr ísfisktogari Vinnslustöðvarinnar, verður tekinn í notkun. 

Systurskipin Breki og nýi Páll Pálsson eru smíðuð í Kína fyrir Vinnslustöðina og Hraðfrystihúsið Gunnvöru. Frágangur skipanna og afhendingin hefur dregist nokkuð en Gullberg verður afhent nýjum eigendum um næstu mánaðamót.

Í samtali við 200 mílur segir Sigurgeir Brynjar Kristgeirsson, framkvæmdastjóri Vinnslustöðvarinnar, að Sindri sé núna í Reykjavíkurhöfn nýmálaður og skveraður. „Gullbergið verður svo tekið í slipp á morgun og afhent nýjum eigendum á þriðjudaginn í næstu viku,“ segir Binni.

Hann segir að Sindri verði gerður út þar til Breki verði kominn í virkni og síðan seldur. „Það tekur alltaf smá tíma að sjá nýtt skip virka og við búum okkur undir það,“ segir hann.

• Blogga um frétt