Viðbótarúthlutun í makríl

Atvinnuvega- og nýsköpunarráðuneytið hefur bætt við tvö þúsund tonna viðbótaraflaheimildum fyrir 2017. Bátar sem stunda makrílveiðar með línu og handfærum geta sótt um viðbótaraflaheimildirnar.

Umsóknarfestur er til loka dagsins í dag og verður heimilt að úthluta allt að 35 lestum í senn á hvern bát. Gjald fyrir viðbótarúthlutun er 2,78 kr./kg til 1. september en þá hækkar gjaldið í 3,27 kr./kg. Úthlutað verður vikulega á meðan viðbótaraflaheimildum er óráðstafað.

Viðbótaraflaheimildir eru óframseljanlegar og þurfa bátar að uppfylla ýmis skilyrði til þess að vera gjaldgengir við úthlutunina. Svo sem að báturinn sé línu- og handfærabátur styttri en 15 metrar og undir 30 brúttótonnum. Báturinn hafi veitt 80 prósent af úthlutuðum aflaheimildum sínum, fengið úthlutun undir 27 lestum eða ekki fengið úthlutun á árinu.

Ítarlegri upplýsingar er að finna á vef Fiskistofu.

• Blogga um frétt