Tóku Grænfriðunga í tog vegna mótmæla

Strandgæslan í Noregi stöðvaði mótmæli Grænfriðunga við nyrsta olíuborpall Statoil. Grænfriðungarnir fóru inn fyrir 500-metra öryggisradíus Songa Enabler-borpallsins á gúmmítuðrum og kajökum.

Frá þessu greinir vefurinn Artic Now en markmið Grænfriðunga var að koma í veg fyrir olíuvinnslu við Korpfjell-olíubrunninn sem er um 400 kílómetra frá meginlandi Noregs.

Statoil sagði athæfið óábyrgt og ólöglegt og tilkynnti um það til lögreglu en skömmu síðar mætti strandgæslan á svæðið. „Artic Sunrise er núna í dragi frá borpallinum á leið til Tromsö,“ segir í yfirlýsingu frá Grænfriðungum en 35 þeirra tóku þátt í mótmælunum.

Samkvæmt upplýsingum frá norskri lögreglu var Grænfriðungum skipað að yfirgefa svæðið og halda sig utan öryggisradíuss borpallsins. Þar sem þeir fóru ekki eftir skipunum lögreglu var ákveðið að kalla út strandgæsluna.

Frétt Artic Now.

• Blogga um frétt