Miklar endurbætur á Norðfjarðarflugvelli

Norðfjarðarflugvöllur var vígður í gær að afloknum viðamiklum endurbótum. Meðal annars var klæðning var lögð á flughlaðið og flugbrautina sem er um þúsund metra löng. Kostnaður vegna framkvæmda við flugbrautina hleypur á 150 milljónum króna. Þar greiddi ríkið um helming á móti Fjarðabyggð, Samvinnufélagi útgerðarmanna í Neskaupstað og Síldarvinnslunni. 

Vígsluathöfnin var fjölsótt í Norðfirði og kom þangað fjöldi flugvéla í tilefni vígslunnar. Gestum var boðið í útsýnisflug á þremur flugvélum sem tóku þrjá farþega hver og fóru um 170 manns í útsýnisflugið.

Jón Gunnarsson samgönguráðherra var viðstaddur vígsluna og sagði hann framkvæmdirnar við völlinn skipta Austfirðinga miklu máli en hann er fyrst og fremst hugsaður sem öryggis- og sjúkraflugvöllur.

Umdæmissjúkrahús Austurlands er í Neskaupstað og það er mikilvægt að öruggur flugvöllur sé í nágrenni þess þegar flytja þarf sjúklinga með flugi. Norðfjarðarflugvöllur var malarvöllur og slíkir vellir þykja alls ekki heppilegir fyrir þær sjúkraflugvélar sem notaðar eru nú á tímum, einkum vegna steinskasts. Þá var völlurinn oft ónothæfur drjúgan hluta árs vegna aurbleytu.

Þó svo að flugvöllurinn sé fyrst og fremst notaður sem sjúkraflugvöllur nýtist hann einnig flugáhugamönnum sem fljúga einkaflugvélum. Þá hefur verið stofnað nýtt flugfélag, Flugfélag Austurlands, sem hyggst nýta völlinn í tengslum við útsýnisflug.

Greint er frá tíðindunum á vef Síldarvinnslunnar í dag þar sem segir: „Framlag Síldarvinnslunnar til framkvæmdanna við flugvöllinn er ekki síst hugsað sem framlag til heilbrigðismála. Það skiptir fyrirtæki eins og Síldarvinnsluna öllu máli að Austfirðingar búi við sem besta heilbrigðisþjónustu og sem mest öryggi. Í því sambandi er Norðfjarðarflugvöllur mikilvægur. Í októbermánuði nk. munu síðan Norðfjarðargöng verða opnuð fyrir umferð og þá batnar aðgengi íbúanna að umdæmissjúkrahúsinu enn frekar og öryggið eykst enn til muna.“ 

• Blogga um frétt