Fækkuðu netum því veiðin gekk svo vel

Kap II hjá Vinnslustöðinni í Vestmannaeyjum hefur veitt yfir 300 tonn af grálúðu í net frá því í júlíbyrjun. Veiðarnar hafa farið fram djúpt úti fyrir Austfjörðum. Kap landaði fyrst 5. júlí á Eskifirði og eftir það tvisvar í viku þar að jafnaði, rúmlega 20 tonnum í hvert sinn.

Greint er frá þessu á vef Vinnslustöðvarinnar en langt er síðan Vinnslustöðin hóf netaveiðar og landvinnslu á grálúðu. Svo vel fiskaðist í upphafi að ákveðið var að fækka netum til að viðhalda gæðum aflans. Byrjað var með tíu trossur en þeim var fækkað í sex. Í hverri trossu eru 70 net.

Kristgeir Arnar Ólafsson, skipstjóri á Kap II, segir að þegar mest hafi látið hefðu fengist fiskar í 84 kör úr 75 netum, alls um 28 tonn. „Við vorum í glimrandi veiði í sumar, langt framar vonum,“ segir Kristgeir sem er staddur í veðurblíðu á miðunum fyrir austan. „Fæstir í áhöfninni þekktu grálúðu sem matfisk fyrr en nú og okkur kemur á óvart hve svakalega góð hún er. Við borðum grálúðu í annað hvert mál,“ segir hann.

Grálúðan er seld fersk og heil til Frakklands ýmist beint frá Eskifirði eða í gegnum Reykjavík. Hluti aflans er fluttur til Vestmannaeyja þar sem lúðan er unnin í frystar afurðir, aðallega fyrir Asíumarkað.

„Grálúðan er fín og verðmæt vara. Þessi árstími er reyndar ekki sá besti til að selja hana en gengur samt vel. Góður markaður er fyrir bæði ferska og frysta grálúðu og við njótum þess auðvitað að hafa byggt upp eigin sölustarfsemi erlendis,“ segir Sverrir Haraldsson, sviðsstjóri bolfiskssviðs hjá VSV.

• Blogga um frétt