Guðmundur framúrskarandi skipstjóri

Guðmundur Þ. Jónsson, skipstjóri á fjölveiðiskipinu Vilhelm Þorsteinssyni EA, hefur hlotið íslensku sjávarútvegsverðlaunin fyrir að vera framúrskarandi skipstjóri.

Í tilkynningu frá aðstandendum Íslensku sjávarútvegssýningarinnar, þar sem verðlaunin voru afhent í fyrradag, er Guðmundur sagður einn af reyndustu og farsælustu skipstjórum íslenska flotans, en hann hefur um árabil stýrt Vilhelm Þorsteinssyni og árum saman skilað mestu aflaverðmæti allra íslenskra fiskiskipa.

Verðlaunin voru fyrst veitt árið 1999 til þess að heiðra afburði og vekja athygli á því besta á sviði fiskveiða, bæði á Íslandi og alþjóðlega, og virðing þeirra eykst stöðugt. Keppnin er hörð um þessa eftirsóttu nafnbót til kynningar á fyrirtækjum og framleiðslu og hafa verðlaunin lengi verið hápunktur hverrar IceFish-sýningar.

• Blogga um frétt