Helsingjanef fundust á Austurlandi

Helsingjanef fundust föst neðan á dufli sem rak á land í Húsavík á Austurlandi, en duflið losnaði upp 370 sjómílum austan við Charleston í Suður-Karólínuríki í mars á síðasta ári.

Þetta kemur fram á vef Náttúrustofu Austurlands. Segir þar að helsingjanef séu krabbadýr sem tilheyri ættbálki skelskúfa (Cirripedia) og séu skyld hrúðurkörlum sem algengir eru í fjörum landsins.

Duflið rak á land í Húsavík á Austurlandi. Ljósmynd/Náttúrustofa Austurlands

Helsingjar taldir koma úr helsingjanefjum

„Þessi sérkennilegu krabbadýr lifa ekki við strendur Íslands en rekur oft hingað með ýmsum hlutum sem þeir hafa fest sig við með löngum vöðvafestum. Fyrr á öldum voru helsingjar og margæsir taldir koma úr helsingjanefjum því þessir fuglar birtust allt í einu að vori og hurfu jafn snögglega og sáust ekki aftur fyrr en að hausti,“ segir í umfjöllun Náttúrustofunnar.

„Sennilega hefur rekaviður með helsingjanefjum fundist um svipað leyti og fuglarnir sáust og fólk talið að þarna væri skýringin af þessum dularfullu fuglum en helsingjanef þykja líkjast nefi þessara fugla.“

Nánar um duflið

Nánar um rannsóknaverkefnið

• Blogga um frétt