Loksins komust skipin í skjól

Þess er minnst í dag að 100 ár eru liðin síðan Reykvíkingar tóku við hafnarmannvirkjum sem verið höfðu fjögur ár í byggingu. Telst þessi dagur, 16. nóvember, mikill merkisdagur í sögu höfuðborgarinnar enda var hafnargerðin gríðarlegt framfaraskref.

Árið 1917 var þeim Knud Zimsen borgarstjóra, Þórarni Kristjánssyni hafnarstjóra og Geir G. Zoëga vegamálastjóra falið að gera úttekt á hafnarmannvirkjunum. Þeir komust að þeirri niðurstöðu að í fáeinum atriðum hefði verktakinn, hinn danski N.C. Monberg, ekki að fullu og öllu fullnægt samningum og tíunduð voru nokkuð óunnin verk.

Það var svo hinn 16. nóvember að hafnarnefnd kom saman á skrifstofu borgarstjóra ásamt fulltrúum verktakans og ráðunautum hafnarnefndar. Náðist þar samkomulag um ágreiningsmál og tók síðan hafnarnefndin við mannvirkjunum með fyrirvörum frá þeim degi. Telst hann stofndagur Reykjavíkurhafnar, að því er fram kemur í fréttaskýringu um hafnarmannvirkin í Morgunblaðinu í dag.