HB Grandi hlaut loftslagsviðurkenningu

HB Grandi hefur hlotið sérstaka loftslagsviðurkenningu Reykjavíkurborgar, einkum vegna 5% lækkunar á losun gróðurhúsalofttegunda á milli ára, ákvörðunar um að hætta að nota svartolíu og loks vegna þeirra sorpflokkunarstöðva sem fyrirtækið hefur á öllum starfsstöðvum sínum.

Vilhjálmur Vilhjálmsson forstjóri HB Granda tók við viðurkenningunni fyrir hönd útgerðarinnar í Hörpu á föstudag, en hana veittu Dagur B. Eggertsson borgarstjóri og Fanney Karlsdóttir formaður Festu.

„Það er okkur heiður að taka á móti þessari viðurkenningu. Loftslagsmál og umhverfismál almennt hafa lengi vel verið okkur mikilvæg og í raun grunnurinn af okkar starfsemi“, sagði Vilhjálmur.

Þetta er í fyrsta skipti sem viðurkenningin er veitt, en auk HB Granda hlaut Isavia hvatningarviðurkenningu og vefurinn loftslag.is hlaut viðurkenningu fyrir upplýsingamiðlun og fræðslu um loftslagsmál, en vefurinn hefur frá árinu 2009 miðlað efni um loftslagsmál.

• Blogga um frétt