Gerðu við veiðarfærin í ofsaveðri

„Við vorum að veiða austur af Akrabergi sem er syðsti oddi Færeyja og veiðin var nokkuð góð.  Við fengum að jafnaði hátt í 400 tonn í holi en við toguðum allt upp í 20 tíma. Slæmt veður um þarsíðustu helgi truflaði veiðiferðina nokkuð en við notuðum bræluna til að lagfæra veiðarfærin,“ segir Tómas Kárason, skipstjóri á Beiti NK, sem kom til Neskaupstaðar í gærkvöldi með 3.100 tonn af kolmunna.

Áhöfnin lenti í miklu óveðri í Færeyjum eins og 200 mílur greindu frá í síðustu viku.

„Þarna gekk ofsaveður yfir og við viðgerðarvinnuna stóðum við í færeyskum snjóbyl. Slíkt veður er ekki algengt þarna,“ er haft eftir Tómasi í dag á vef Síldarvinnslunnar.

Frétt af mbl.is

„Alveg vitlaust veður“

Engin ástæða til að kvarta

Fram kemur enn fremur að síðustu daga hafi 7.100 tonn af kolmunna borist í verksmiðjur Síldarvinnslunnar í Neskaupstað og á Seyðisfirði. 

„Bjarni Ólafsson AK kom með 1.800 tonn til Neskaupstaðar sl. fimmtudag og upplýsti Gísli Runólfsson skipstjóri að aflinn hefði hengist í fjórum holum en venjulega var togað í 5-12 tíma í hvert sinn,“ segir á vefnum.

„Á föstudag kom Börkur NK til Seyðisfjarðar með 2.200 tonn sem fengust í átta holum. Að sögn Hálfdans Hálfdanarsonar skipstjóra var töluvert af fiski að sjá á miðunum en hann var ekki mjög þéttur þannig að veiðin var ekki með skarpasta móti þótt engin ástæða væri til að kvarta.“

• Blogga um frétt