Spyrti Gunnar Smára og Heiðveigu saman
Setja bókamerki
Bergur Þorkelsson, verðandi formaður Sjómannafélags íslands, segir Gunnar Smára Egilsson, stofnanda Sósíalistaflokks Íslands, standa að baki framboði Heiðveigar Maríu Einarsdóttur til formanns félagsins. Hörð átök hafa verið innan Sjómannafélagsins vegna framboðs Heiðveigar og var henni vikið úr félaginu.
Heiðveig og Bergur voru gestir í Kastljósi kvöldsins í Ríkisútvarpinu. Sagði Heiðveig þar vinnubrögð stjórnenda Sjómannafélagsins og kjörstjórnarinnar fordæmalaus en hún hefur farið með brottvikningu sína til félagsdóms og segir hún niðurstöðu að vænta fyrir jól. Hún segist ítrekað hafa óskað eftir upplýsingum frá starfsmönnum og stjórnarmönnum félagsins um hvernig hún ætti að skila inn framboði en alls staðar komið að lokuðum dyrum. „Það kemur hvergi fram í lögunum hvernig eigi að skila listum,“ sagði hún í Kastljósi.
Bergur sakaði Heiðveigu um lygar og aðdróttanir. Sagði hann hana meðal annars hafa logið til um tengsl sín við Gunnar Smára. Sagði hann Gunnar Smára meðal annars hafa hringt inn á skrifstofu Sjómannafélagsins og villt á sér heimildir þar sem hann þóttist vera blaðamaður að spyrjast fyrir um næstu kosningar. Hún hafi haldið ræðu á viðburði tengdum Sósíalistaflokknum 1. maí og sést til hennar með Gunnari Smára á kosningavöku Sólveigar Önnu Jónsdóttur þegar hún var kjörin formaður Eflingar. „Gunnar hefur hringt í félagsmenn að afla þínu kjörgengi fylgis og þið sátuð á Kaffitári í Borgartúni í október. Viku seinna ferð þú í viðtal hjá Páli Magnússyni á K100 og segist ekki kannast við Gunnar Smára,“ sagði Bergur.
Heiðveig svaraði Bergi og sagði ræðuna 1. maí ekki hafa verið á viðburði tengdum Sósíalistaflokknum og hún hafi ekki sótt kosningavöku Sólveigar Önnu með Gunnari Smára. Sagði Bergur þá að hún hafi lýst því yfir umrædda kosninganótt að Sjómannafélagið væri næst en því hafnaði Heiðveig sömuleiðis. „Þetta er bara helbert kjaftæði,“ sagði Heiðveig.
„Það stendur enginn á bak við mig. Ég er búinn að tala við fullt af fólki í öllum flokkum,“ sagði Heiðveig og benti á að hún hafi verið í framboði fyrir Sjálfstæðisflokkinn 2016. Heiðveig bætti þó við að jafnvel þótt svo væri, að hún væri tengd Sósíalistaflokknum, að það réttlætti ekki fordæmalaus vinnubrögð Sjómannafélagsins sem fari ekki eftir stjórnsýslureglum og kosningalögum og starfi fyrir luktum dyrum.
Rannsaka drómasýki í hestum
Opin fyrir almennri kosningu biskups
Fordæmir leyndarhyggju í skólamálum
Fannari líst ágætlega á aðgerðirnar
„Trúlega rákumst við saman“
Mennirnir í haldi lögreglunnar á Suðurnesjum