Fá merki um að sátt náist
Setja bókamerki
/frimg/1/46/57/1465795.jpg)
Frumvarp Svandísar Svavarsdóttur matvælaráðherra til nýrra heildarlaga um sjávarútveg átti með viðamiklu samráði undir merkjum Auðlindarinnar okkar að skila aukinni samfélagslegri sátt um íslenskan sjávarútveg. Miðað við þær umsagnir og yfirlýsingar sem hagaðilar hafa sent frá sér vegna frumvarpsins – sem og tillögur og skýrslu Auðlindarinnar okkar – hefur tekist að mynda nokkuð umfangsmikla samstöðu um málefnið, en samstaðan felst aðallega í óánægju með fyrirhugaðar breytingar sem ýmist eru sagðar ganga of langt eða of skammt, að því er fram kemur í fréttaskýringu Í Morgunblaðinu í dag.
Benda hagaðilar á að ekki hafi verið farið í greiningu á mögulegum áhrifum breytinganna, að ekki hafi verið staðið við gefin fyrirheit og að samráðsferlið sem lagt var upp með hafi verið sniðgengið.
„Ljóst er að málefni sjávarútvegs snerta hagsmuni víða í samfélaginu og því er ekki von á öðru en að umsagnir verði bæði margar og efnismiklar. Vegna þess að ferlið er í miðjum klíðum er ekki tímabært að fjalla um einstakar athugasemdir eða viðbrögð við þeim á þessum tímapunkti,“ svarar Svandís er hún er innt álits á þeirri gagnrýni sem frumvarpið hefur hlotið síðustu daga. „Ákveðið hefur verið að framlengja frest til umsagna um frumvarpið til 10. janúar. […] Mikilvægt er að sem flestar athugasemdir rati í samráðið svo unnt verði að fara yfir þær í heild.“
Þeir sem hafa kvatt sér hljóðs og gagnrýnt frumvarpið, tillögur í skýrslu Auðlindarinnar okkar og/eða samráðsferlið sjálft eru ekki fáir. Má í þessu samhengi nefna Landssamband smábátaeigenda (LS), Samtök fyrirtækja í sjávarútvegi (SFS), Tálknafjarðarhrepp, útgerðir í Stykkishólmi, Samtök fiskframleiðenda og -útflytjenda (SFÚ), Strandveiðifélag Íslands, Félag skipstjórnarmanna, Félag vélstjóra og máltæknimanna – VM, Sjómannasamband Íslands, Starfsgreinasambandið, Samtök smærri útgerða, Landvernd, Unga umhverfissinna, Viðskiptaráð og skólameistara fimm framhaldsskóla, nánar tiltekið Fjölbrautaskóla Norðurlands vestra, Fjölbrautaskóla Snæfellinga, Framhaldsskólans í Vestmannaeyjum, Menntaskólans á Ísafirði og Verkmenntaskóla Austurlands.
Svandís svarar því ekki hvort hún hafi enn trú á að hægt verði að samþykkja frumvarp á Alþingi sem skapi sátt um sjávarútveginn.
„Málin eru að þokast eitthvað áfram“
Vill hafa ungan ráðgjafa sér við hlið
Isavia íhugar viðbrögð við sýknudómi Hæstaréttar
Grindavíkurbær fækkar starfsfólki
Hera komst ekki áfram
Eina leiðin að sekta ökumenn
Hyggst halda sauðfé á Bessastöðum