McLaren hefur staðfest að nýr sportbíll, P1 GTR, verði frumsýndur á bílasýningunni í Genf í mars í endanlegri útgáfu. Sé hann nú þegar klár til framleiðslu.
Bíll þessi er sagður afar kraftmikill í hlutfalli við eiginþyngd sem náðst hafi að lágmarka með tækni sem nýtt hefur verið í smíði kappakstursbíla, svo og sérlegri stilltri aflrás tvinntækninnar.
P1 GTR-bíllinn er 10% léttari en sami bíll í götubílsútgáfu. Að baki á hann mörg þúsund kílómetra þróunarakstur á kappakstursbrautum í Englandi og annars staðar í Evrópu auk prófana í afar miklum lofthita í Barein og Qatar.
Hefur engu verið til sparað við þróun loftafls bílsins, straumfræði hans og aksturseiginleika.
Smíði McLaren P1 GTR hefst síðar í ár en í millitíðinni verður verðandi keppnismönnum á bílum af þessu tagi leyft að æfa sig á forsmíðiseintökunum.
Genfarsýningin stendur yfir frá 5. til 15. mars næstkomandi.