Volkswagen (VW) er stærsti bílsmiður heims ef marka má sölutölur á fyrri helmingi ársins sem bílaframleiðendur eru að birta um þessar mundir.
Fyrr í mánuðinum sagðist VW hafa selt 5,04 milljónir bíla fyrstu sex mánuðina en Toyota birti sínar tölur í morgun og samkvæmt þeim hefur VW tekið fram úr japanska risanum, í fyrsta sinn í sögunni.
Toyota segist hafa selt 5,02 milljónir eintaka á tímabilinu janúar til júníloka, eða um 200.000 færri bíla en Volkwagen. Er það 1,5% minni sala en á sama tímabili í fyrra. Mestu munar í því um tregðu í sölu á heimamarkaði í Japan.
Volkswagen segist hafa notið góðrar sölu í Evrópu og Norður-Ameríku en samdráttur hafi orðið hjá fyrirtækinu á Kínamarkaði. Var sala VW fyrstu sex mánuðina 0,5% minni en á sama tímabili í fyrra.
Búist er við að General Motors (GM) birti sölutölur sínar á fimmtudag. GM var stærsti bílsmiður heims áratugum saman til 2008 er Toyota tók fram úr honum.