BL nálgast þrjú þúsund bíla markið

Bifreiðaumboðið BL seldi 2.806 nýja bíla fyrstu níu mánuði ársins, sem er um 48% aukning miðað við sama tímabil 2014. Hjá umboðinu er  gert ráð fyrir að í byrjun nóvember selji það þrjú þúsundasta bílinn í ár.

Á sama tíma og aukningin nemur 48% hjá BL óx heildarmarkaðurinn um 42%.

Í september afhentu bílaumboð landsins 885 bíla til einstaklinga og fyrirtækja, þar af 78 bílaleigum landsins. Af heildarfjölda bíla í mánuðinum afhenti BL 207 bíla, eða rúm 23% þeirra sem umboðin seldu í september, að því er fram kemur í tilkynningu frá BL.

Sem fyrr eru það einkum fjórhjóladrifnir jepplingar sem einkenna bílasöluna hjá BL og eru það aðallega gerðir frá Nissan, Hyundai og Renault sem standa upp úr í þeim efnum. Nýr fjórhjóladrifinn Hyundai Tucson var til að mynda í hópi mest seldu einstakra gerða hjá BL í september þar sem 19 bílar voru afhentir. Í kjölfar hans kom nýi jepplingurinn Renault Kadjar með 15 bíla. Söluhæsti jepplingurinn var þó sem fyrr Nissan Qashqai með 21 bíl.

Á tímabilinu frá og með janúar til og með september í ár voru 34% fleiri bílaleigubílar afhentir heldur en á sama tímabili 2014, með 5823 bíla núna á móti 4360 á síðasta ári.