Það þykir heldur ólíklegt að kvikmyndin Mission Impossible III, sem telur yfir tvær klukkustundir, vinni Óskarinn sem besta kvikmyndin á Óskarsverðlaunahátíðinni á næsta ári, en tveggja mínútna sýnishorn (e. trailer) úr myndinni var hinsvegar valið besta sýnishornið á Golden Trailer verðlaunahátíðinni sem var nú haldin í sjöunda sinn.
Dómnefndin, en í henni voru m.a. leikstjórarnir Quentin Tarantino og Guy Ritchie, valdi sýnishornið úr Mission: Impossible III það besta af öllum sýnishornum í ár. Þá var það einnig verðlaunað sem það besta í flokki hasarmynda og í flokki stórmynda sumarsins 2006.
Aðstandendur verðlaunahátíðarinnar, sem var sett á laggirnar árið 1999, segja hana vera þá „hröðustu“ af öllum svipuðum hátíðum.
Meðal annarra kvikmynda sem fengu verðlaun fyrir besta sýnishornið voru Harry Potter og Eldbikarinn, Wedding Crashers, March of the Penguins, Good Night, and Good Luck, Match Point, Thank You for Smoking og Transamerica.