Sala á smokkum hefur rokið upp í Suður-Kóreu og bókunum á svokölluð ,,ástar-mótel" hefur líka fjölgað mikið, eftir að nágrannarnir í norðri sprengdu kjarnorkusprengju í tilraunaskyni. Þó hefur lífið gengið sinn vanagang í S-Kóreu en svo virðist sem kynlífsiðkun hafi aukist og telja margir að Suður-Kóreumenn hafi þurft að losa um aukna streitu.
Sölutölur smokkaframleiðanda voru birtar í dagblaðinu Chosun Ilbo, en sala á dag fór úr um 1.500 smokkum í 1.900. Dagblaðið skreytti fréttina með mynd af eldflaug með smokki á.
Forstöðumaður kóreskrar kynfræðistofnunar, Seong Gyeong-won, segir ekki óvanalegt að fólk stökkvi í bólið þegar kreppuástand sé. ,,Kynlíf losar um streitu ... það er ein af tíu ástæðum þess að kynlíf er gott fyrir líkamann," segir Gyeong-won. Sky fréttavefurinn segir svo frá.