Cherie Blair, eiginkona Tonys Blairs, forsætisráðherra Bretlands, var fyrirsæta á námsárum sínum og sat m.a. fyrir hjá málaranum Euan Uglow þegar hann málaði myndina Striding Nude, Blue Dress. Cherie var þá aðeins klædd ermalausum kjól, sem var opinn að framan, að sögn breska blaðsins The Times, og fékk jafnvirði 650 króna á tímann fyrir starfið. Uglow, sem nú er látinn, lauk aldrei við málverkið. Það var hins vegar sýnt einu sinni opinberlega árið 1983.

Blaðið hefur eftir listaverkasalanum Will Darby, að Uglow hafi verið vinur Blair-fjölskyldunnar og eftir að Tony fór að skipta sér af stjórnmálum hafi málarinn óskað eftir því, að málverkið yrði aldrei sýnt aftur.

The Times segir, að forsætisráðherraskrifstofan hafi ekki viljað tjá sig um málið.