Hótelið For Seasons í Jakarta á Indónesíu býður nú upp á heldur dýran hamborgara á matseðli sínum. Hamborgarinn kostar 110 dollara, um 7.500 krónur. Það er tvöfalt mánaðarkaup margra Indónesa. Í hamborgaranum er Kobe kálfakjöt með foie gras lifrarkæfu, portobello-sveppir og kóreskar perur. Með honum eru bornar fram hefðbundnar, franskar kartöflur.
Hamborgarinn selst þó ekki eins og heitar lummur en þó hafa selst 20 stykki í desembermánuði einum saman. Kobe kálfakjöt þykir afbragðsgott og er afar dýrt. Kálfarnir í Kobe fá sérstaka meðferð, drekka blöndu bjórs, mjólkur, bætiefna og borða gras sem ekki hefur verið úðað með skordýraeitri. Allt hráefni í hamborgarann er innflutt og er verðið afsakað með því. Reuters segir frá þessu.