Breska fyrirsætan og leikkonan Elizabeth Hurley og eiginmaður hennar, indverski kaupsýslumaðurinn Arun Nayar, vilja endilega eignast barn og eru tvíburadrengir efstir á óskalistanum hjá Hurley. Eru hjónakornin ólm í að eignast stóra fjölskyldu og það sem fyrst.
Að sögn Hurley bíður sonur hennar, Damian, sem er fimm ára gamall en faðir hans er bandaríski kvikmyndagerðarmaðurinn Steve Bing, í eftirvæntingu eftir því að eignast systkini. Damian kallar Nayar pabba og lítur á hann sem föður sinn enda var hann einungis níu mánaða gamall þegar Hurley og Nayar fóru að draga sig saman. Segir Hurley að Damian þekki í raun ekki tilveruna öðruvísi en með Nayar við hlið sér. Segir Hurley að Damian sé þegar kominn með nöfn á tvíburasystkini sín: Fred og Daphne, sem eru eftirlætis persónur hans úr teiknimyndunum um Scooby Doo.