Naomi Campbell söm við sig

Æðisköst ofurfyrirsætunnar Naomi Campbell eru nú orðin svo regluleg að þau líkjast helst ofskrifuðu hlutverki í lélegum farsa. Síðasta æðiskastið heltók Campbell nú á fimmtudaginn þegar henni var meinaður aðgangur um borð í flug frá London til New York en hún taldi sér óhætt að mæta aðeins 11 mínútum fyrir brottför.

Fyrirsætunni þótti ákvörðun flugfélagsins að sjálfsögðu út í hött og auk þess að stappa niður fótunum eins og krakki öskraði hún: „Þið verðið að hleypa mér inn! Látið ekki svona!"

Starfsmenn flugfélagsins buðu Campbell að fljúga án farangursins en það tók okkar kona að sjálfsögðu ekki til greina. „Þið hljótið að vera að grínast. Þið eruð alltaf að týna farangri og það er ekki séns að ég treysti ykkur fyrir mínum töskum."