Danski tónlistarmaðurinn Kim Larsen lenti á Reykjavíkurflugvelli í hádeginu í dag en hann mun halda tónleika fyrir íslenska aðdáendur sína, ásamt hljómsveit sinni Kjukken, annað kvöld. Þetta verða lokatónleikarnir á ferðalagi Kims og Kjukkens um Norðurlöndin í haust. Kim Larsen sagði í samtali við mbl.is að hann hlakkar ávallt til að spila tónlist. Það væri eins og að kyssa konu. Það sé frábært.
Larsen hélt síðast tónleika á Íslandi fyrir tveimur árum. Þá hélt hann tvenna tónleika fyrir fullu húsi og gríðarlega góð stemning skapaðist.
Nýjasta plata Kim Larsen og Kjukken kom út fyrir jólin í fyrra og ber hún nafnið „Gammel hankat“ sem útleggst á íslensku sem „Gamli fresskötturinn“.
Tónleikarnir fara fram í Vodafonehöllinni og hefjast kl. 21.