Landslið í gjörningum

„Þetta er það fólk sem hefur hvað mest verið að nota gjörninga, það má segja að þetta sé landsliðið í gjörningum,“ segir Snorri Ásmundsson, einn níu listamanna sem frumflytja gjörninga í Kling og Bang gallerí klukkan 17 í dag.

Snorri segir ekkert sérstakt þema eða grunnhugmynd að baki sýningunni og að listamennirnir séu mjög ólíkir innbyrðis. „Það eru ólíkar kynslóðir þarna og áratuga aldursmunur á þeim elsta og yngsta. Hannes Lárusson er búinn að vinna með þetta form í þrjátíu ár, það má segja að hann sé meistarinn og svo erum við nemendur hans þarna með honum.“ Auxpan, öðru nafni Elvar Már Kjartansson, er 25 ára og sá yngsti í hópnum.

Vinjettu-höfundurinn og lífskúnstnerinn Ármann Reynisson heldur utan um dagskrána. „Hann verður kynnir þarna og gefur gjörningunum einkunnir. Þetta verður samt ekki keppni, það er ekki hægt að keppa í myndlist,“ segir Snorri.