Suri Cruise elskar naglasnyrtingu

Leikarinn Tom Cruise segir frá því í viðtali við þáttastjórnandann Oprah Winfrey, að Suri dóttir hans og eiginkonunnar Katie Holmes viti fátt skemmtilegra en fara á snyrtistofu með móður sinni. Í sérstökum tvöföldum þætti sem Winfrey gerir í tilefni af 25 ára leikaraafmæli Cruise, segist hann vera heillaður af Suri. „Henni finnst gaman að syngja og dansa, og láta snyrta á sér neglurnar með mömmu – alveg frábær.“

Rætt er við ýmsa vini leikarans. Victoria Beckham rifjar upp heimsókn þeirra vinanna á veitingastað í Madríd, þar sem þau dönsuðu öll konga. „Þessi tvö kunna svo sannarlega að skemmta sér!“ segir hún um Cruise og Holmes.

Frú Beckham opinberar að á fyrsta stefnumóti þeirra Davids hafi þau farið að sjá Jerry Maguire í bíó, með Cruise í aðalhlutverkinu. Þegar Cruise frétti það sendi hann David Beckham jakka sem hann klæddist í myndinni, áritaðan. „David hefur ekki farið úr honum síðan,“ segir Victoria.