Salma Hayek skilin

Leikkonan Salma Hayek og franski milljarðamæringurinn François-Henri Pinault eru skilin að skiptum, aðeins örfáum mánuðum eftir að þau eignuðust barn saman. Ástæða sambandsslitanna er sú að þau þurftu starfa sinna vegna að búa sitt hvorum megin á hnettinum.

Hayek hefur dvalið síðustu misserin í kvikmyndaborginni Los Angeles, en fyrirtækjarekstur Pinaults krefst þess að hann búi í París. Meðal þeirra fyrirtækja sem hann á eru Gucci, Yves Saint-Laurent og Balenciaga.

Vinir og fjölskylda parsins voru farin að hlakka til brúðkaupsins sem átti að verða mjög stórt og íburðarmikið. Þó að þau hafi ekki formlega gifst þá er reiknað með því að Hayek fái engu að síður myndarlegan framfærslueyri frá barnsföður sínum.